As últimas investigaçons revelarom a existência nos linguados dum par de orgãos que lhes servem para captar informaçom do solo. Estes orgãos, sitos no seu costado esquerdo, som uma especializaçom da linha lateral. A travês destes orgãos, o peixe é capaz de captar a linguagem do Nume e predizer o futuro.
Há milénios que os druidas eram conhecedores da capacidade dos linguados para ler as mensagens do Nume. Alguma vez lhes tenhem preguntado o seu parecer sobre algum desígnio confuso.
Vários mitos tentarom explicar esta capacidade das solhas. Segundo a gente do porto de Santa Marinha, os linguados usavam orelhas de mar para espreitar as conversas dos deuses. O avance da ciência demostrou que o mito nom ía desencaminhado.
Queda agora por descubrir qual é o sistema que utilizam para a comunicaçom linguado-humano, clave no processo de revelaçom. Sabe-se que conhecem a linguagem humana mas a biología ainda nom explica como produce o som. Sobre o idioma que utiliza, só sabemos, por boca de testemunhas, que o linguado “fala claro, em cristão”.
Para quem quiger o oráculo dum linguado, saiba que os soleidos nom som amigos de falar de balde; compre oferecer-lhes um galano. Uns grans de café adoitam ser bem recebidos. O linguado valora moito a cafeína. É difícil manter-se esperto para o estudo do Nume quando um passa o día deitado.